Syair Aceh "

Saleum londireue do’a lon bagi

Keu bandum akhi tuha ngon muda

Pujoe keu Allah seulaweut keu nabi

Nyang bri raseuki nikmat syuruga

Bacut lon canek ca-e minggu nyoe

Keu bandum tanyoe umat iseulam

Udep lam donya bek sampe rugoe

Meuseubab laloe keu hukom tuhan

Oh watee tawoe tanyoe bak tuhan

Dua tujuan syurga neraka

Meunyoe meukeusud meutuah badan

Beuna hai taulan gunci syuruga
lam kitab hadis haba geurawi

Muhammad Nabi peugah bak umat

Tamong syuruga na nam neuk gunci

Soe nyang paduli teuntee seulamat

Peugah ube buet pubuet ube na

Keurija beuna haba bek sulet

Meunyoe manusia jujoo tan le na

Akherat donya teuntee meupalet

Janji bek mubah, amanah bek meutuka

Peuglah beusigra peutroh beubagah

Bek sampe tuwoe gata ceulaka

Lam apui raya meukuah-kuah

Pharot tajaga syahwat bek luhu

Tatheun hai alu birahi gata

Bek teupeungaroh film ngon lagu

Atawa hantu di alam maya

Mata bek teusuet kalon buet jahee

Bek laloe hatee piasan donya

Taglip Qur-an tapeutrang hate

Ulee beusabe pikee agama

Jaroe bek cabak rahob ata gob

Reubah lam leuhob hana soe hila

Asoeteuh luroh darahteuh meulhob

Akhee geutinthob dalam nuraka

Sep ohnoe dilee ca-e loncanek

Haba dari nek asai bak nabi

Beu-ek tapubuet adak rayek hek

Syurga meutipek teuhah Tuhan bri ..